我們的游泳池
桐霖,別矣!

好突然,真係好突然......之前同我通過多次Email,我地仲互相鼓勵過既台灣游泳網站網主 -- 桐霖,原來係聖誕時去世,23歲.......

我今日去台灣網頁搵野,先知道呢個咁唔開心既消息,個心好唔舒服......因為我地已經半年冇EMAIL來往......原來佢已經死左........

睇番個報導,桐霖係100%健康人,聖誕時無端端暈倒,過幾日就猝死.....個時我正同港隊係昆明集訓,估唔到佢.......

桐霖係台灣背王,100背長池紀錄係59秒79,佢同我講過佢識Alex 同Sherry,仲同Alex 鬥過......大約在去年佢去左服軍役,退出國家隊,專心整個全台灣第一既游泳網頁,"水泳.飛 -- swimfly.net",佢之前係參考過我既網頁黎做,仲成日Email同我交換心得,我覺得佢好好人,好開朗,好有理想,我仲係度諗,大陸有中國第一大非官方泳網"悠泳世界",香港有我傑仔游泳池,台灣又有桐霖既"水泳.飛",真係中港台合作......

可惜,我今日我先知道,桐霖已經死左......再去佢個網頁睇,三朵小百合下面說 "Your name means Taiwan spirit".....

<請到紀念桐霖特輯>

Poly U, Proud of you!

總於完左個大專盃喇,Polyu比預期成績好,雖然總成績都係第三,輸比HKU同中大,不過男仔有第二,而女仔都有第三,算有晒交代,而且成績唔係最重要,我最感動係見到大家個種投入lor,係間間U都冇既,好似我地係嗌得最大聲既一間,有最專業既成員(有按摸隊),同埋有女仔會因為自己游得唔好而喊,又有人因為游到BEST而開心到大叫,個種互相支持同投入既感覺,係我前所未有既....最開心係男仔兩場接力上面,雖然我地牌面輸晒比HKU,但係兩項接力我地都WIN晒,而我地係上面係咁嗌都可能比到自己隊員一種信心,迫使佢地游快D,真係好開心架....真正[感受到咩叫喜出望外....

講到自己,唉!真係游得唔好,算喇,盡左力喇....比賽之前陳sir叫我去游早水喎,哈哈,感受一下香港泳員既苦況,不過我諗緊,5:30am要去到灣仔,咁我要4:30起身,仲有冇小巴去呢...而且個幾日又幾凍喎..諗多兩諗,最後都係放棄左...不過而家班港隊日日都係咁練,自己都有d慚愧....唉! 不過我都希望有一日同佢地練下水,睇下香港隊訓練有幾辛苦,再同大家分享一下,哈哈!

大專盃個日,方力申有同我傾計,佢叫我唔好放棄個網頁喎,因為原來佢都係經我個網先知道泳壇最新消息,難怪既,佢咁忙,又點會有時間留意泳界喎,我同佢講,叫佢都唔好唔游水呀,因為我覺得泳壇仲需要多d方力申呢種人,對游水個種熱誠...諗番佢今次比賽,我真係好佩服佢,佢而家仲出新cd,做宣傳而家好忙,知道自己有工作,岩岩撞左大專盃,佢都要堅持游早上項目,連200蛙都肯游,仲同200自,接力,一次過個一個鐘內游晒,之後仲趕去排舞,下午又趕番黎游接力,期間仲不斷有人同佢映相同簽名,基本上冇時間比佢休息,但佢仲可以游到2分30個蛙,2分04個200自,對一個冇練咁耐水既人黎講簡直係難以置信....雖然佢最後都因為太累,接力既50背輸比我地既陳景熙,不過我都真係好佩服佢對游水個種執著同堅持,佢真係好熱愛游水,完全唔計較得失..ALEX,香港仲需要你!

講到司徒,佢下午真係有黎睇我呀,不過佢之後又要趕返學,所以黎左睇一陣就走...其實今年同佢真係熟左好多,好似學界佢約我睇左成朝比賽,同佢傾左好多野,仲介紹左好多泳手比我識,佢真係好nice...今年佢住hall,見佢既時間都多左,而家成日都可以係學校見到佢....司徒可以將我同泳界d人拉近,因為佢識好多人,同埋佢又受歡迎呢,同佢一齊可以識多好多人,見識都多左...我同班hk team熟,不多不少都係因為佢架...haha,司徒,多謝你!

Ken Doo,Can U do it?

好快又year2喇,今年大奪盃我地Poly真係比上年弱左,其中司徒因為游夠四年而冇得游呀今年(兩年IVE,兩年POLY HD),雖然佢仲有三年DEGREE係POLY,而隊長呀大斌哥又畢業,Adam又無端端quite左,而家得番KenDoo,陳景熙,好彩今年入番個盧國雄,不過係殘晒同傷晒既阿Lo,唉..唔怪得之今年我呢d都擔正lor....

我今年真係好努力練水,同好投入係個team度,因為我都year2喇,驚出年冇咩時間仲可以游....今年我會游100米蝶,唉...而家仲諗緊點可以唔拉車,司徒同我講,佢下午會去睇我比賽,我真係要游快d入決賽喇....如果唔係點可以游到佢個主項呀...哈哈!希望唔好拉車拉得咁勁喇,不過好似黃國基都有游100蝶,死硬喇我....

講到隊team,今年多左好多新既女仔,而且有d都ok勁架,有梅姐加入,真係勁左好多,可惜我地今年男仔弱,要champ都好難lu......不過最重要係我地今年班新人好玩得,我地好快熟lor,雖然游水唔太勁,但係好好玩呀隊team.好似今年Kendoo都好多時同我地一齊玩,仲一齊練水,比起上年只係見過佢一次,今年佢真係投入左好多,可能見我地好玩喇,仲試過同我地唱k都呢......

比賽前幾日,我地仲有上報紙呀,不過比HKU張大頭相搶晒.....算喇,我地今年係差d,不過都係第一次成隊team上報,班女仔個個都好開心,都冇白廢我叫個記者黎...haha

講番今年形勢,HKU有傳有清華國寶,仲有鬼仔鐵人,加埋ALEX,黃國基做骨幹,可以話無得鬥,女仔又有PK個D勁人,好勁LOR...中大今年進步左好多,除左布倫個D,又有趙善穎同呀ANN,女人真係好強....而黑馬CITY都入左蛙王吳偉然呀,而科大仲有個游50蝶有26既澳洲EX-CHANGE,不過好彩佢大奪因為上堂冇時間游個人項目喎,同埋佢而家仲未有泳會....間間都好勁呀...

Anyway,希望今年可以游快d喇,Poly努力呀!

傑仔上報紙

<< 報章內文 >>

上報當日(2003年8月29日)

上報當日,我一日內發生左好多意想不到既事.....

好多人同我講番.......睇到我上報係因為係巴士地鐡上,D人係度睇波經(個日係球賽日), 背頁就比車上既人睇到我既文章,好多人就咁睇到我上報,哈哈!!!好攪笑...

仲有, 有好多人ICQ add我同email比我,咩人都有呀,一D好似好耐冇聯絡既小學同學,以前學校呀SIR都有,報紙既威力真係幾大........個日一日仲有1000人過過我網,破晒record!!!

真係要多謝東方日報體育版記者菁菁,佢真係好好人,肯比機會我一個泳界small potato上咁大版報紙,比我一個好大既鼓舞同得到人認同,以前我有諗過放棄,因為做網有時會吃力不討好,有人會覺得自己多事,但係而家知道大多數人都係支持自己,見到自己愈來愈多人識,就明白到自己既努力冇白廢到.....我會keep on努力既!

訪問當日(2003年8月15日)

好開心呀,第一次比記者訪問呀,仲係體院映左好多相,同Sherry以及司徒合照, 我真係好有滿足感呀!

其實, 之前收到封email, 係東方日報體育版記者send比我, 話想同我做個訪問, 係校園體育既, 有關我個網頁同游水生涯, 我知道之後當然好開心喇。 佢打比我同左我傾左45分鐘電話, 問左我好多野了解我, 同埋想約我出黎映相, 我諗左好多地方, 好似Poly,灣仔泳池同埋體院, 最後都係選左體院。 因為想見到多d香港隊練水嘛, 哈哈!

8月15日去左映相, 個日一早我都要去教游水呀, 之後下午搭的士趕去體院, 都冇咩時間打扮, 仲好熱呀個日, 成身大汗咁去到。 去到之後, 原來體院泳池仲熱呀, 我不停咁流汗流汗....之後個記者黎到, 佢都幾NICE呀, 咩都傾得, 其實好似同佢閒談一樣, 不過真係太熱喇, 成身都濕晒, 一路映相一路流汗.........

之後我地映相, 但係又驚比人閙, 因為原來係體院映相要申請架, 不過我地唔理喇, 盡量唔咁揚喇, 但係我地反而去左好多家長坐個邊看台......一開始叫我打開個NOTEBOOK, 做佢叫我做既POST, 對住個泳池映, 跟住開始不同角度咁映, 有好多人開始注意我地, 以為我地做咩....哈哈! 個日咁岩又見到有班TVB既人拍野, 仲見到電視劇既主角陳鍵鋒, 真係幾靚仔架喎。 之後佢叫我做多d post, 好似V字手呀, 指住個notebook咁, 好攪笑。 不過d閃光燈不停咁閃左十幾下, 就聽到有兩個家長細細聲講, "而! 邊個黎呢? 好似係無線冇見過佢...." 哈哈, 佢當左我都係TVB小生做緊訪問。最後, 有個泳池既人出黎干涉, 話唔比映相, 不過我地都映完LU, HAHA

咁岩, 個時見到港隊黎練水, 有係美國返黎既蔡曉慧同埋司徒瑞祈。仲以為佢地唔係體院練添, 因為之前聽講佢地因為要係泳總開AAG個會, 會係灣仔練下午....不過真係好好彩, 去世大既蔡曉慧同司徒瑞祈都有黎體院練水, 因為我冇同佢地講過會黎做Interview, 而Sherry一見到我就叫, "嘩! 傑仔呀! 我成日有睇佢個網架..."哈哈, 我第一次面對面見Sherry, 從來只有人地會叫"嘩! 蔡曉慧呀!" 而家佢咁叫我, 我真係好開心....之後我同Sherry司徒一齊映相, 佢地仲做好多古怪動作, HAHA. 之後個記者訪問佢地兩個對我個網既感想, 不過唔比我聽得架... :P

完左之後, 我地入去有冷氣既室內體育館傾左一陣關於我既野, 其中我講左好多, 除左我對香港泳壇既個人觀點外, 仲有我點解咁LIKE蔡曉慧同埋司徒瑞祈, 仲有講下好幫得我既Dickson, 好多好多.....之後我同佢一齊搭火車到九龍塘, 各有各走喇....

我最記得我講....原來要係泳界出名, 唔一定要游水好叻, 自己知道自己唔係游得, 原來可以係網頁上貢獻自己, 亦都可以同一班一級泳員上報紙做訪問, 真係好有滿足感架!.....違憾係見唔到呀陳SIR喇. 不過我一定會努力做好個網頁, 繼續發展自己既能力, 正如陳SIR同我講過, 係網頁上都可以"開創一個新天地"........

香港泳員上天橋

理工時裝設計系猛人輩出,想博出位真係唔容易,所以司徒瑞祈諗計設計冷門的男裝運動休閒服為畢業報告的主題,百分百自創、自縫、自演,呢位大專最佳男子運動員仲真人示範,型人配靚衫,襯絕!

平日見到的司徒通常都係T-Shirt、短褲配波鞋,他的衣櫃內三分二的褲子都是短褲,冬天都著短褲,皆因一日要練兩次水,兼且在理大及泳館撲來撲去,簡單服裝最好不過。

但其實周身刀的司徒,強項之一就係做衫,他的作品在一百廿多位應屆畢業生中,入選最後廿四名,將會在一年一度在洲際酒店舉行的「畢業Show」中上天橋,其中三套已經完工,現在就著手做另外三套。「因為我自己最鍾意著運動型,所謂唔熟唔做,可以入圍我都有d意外。」司徒說:「頭三套衫大約用左個幾月時間去做,首先去深水步揀布,與Kim Sir(導師)研究,然後買布、畫紙樣、設計,到落手落腳用衣車做出來。」

司徒雖然是大男孩,不過用衣車方面肯定叻過唔少女仔,他車一件衫的最快速度大概要兩至三日。正所謂日子有功,司徒未入理大之前,曾在製衣業訓練局學藝,所以難唔到佢。

「另外三套我繼續會用花布及鮮豔的顏色,同埋用黑白的條子,這是這系列服裝的特色。」司徒還表示希望香港泳隊隊友方力申在「畢業Show」中友情客串,不過以司徒擁有五呎十一吋身高及卅八吋胸肌的壯碩身材,樣貌又似藝員陳豪咁型,自己上天橋都一樣掂!

2003年6月17日司徒瑞祈更邀請一眾香港泳員客 串行Cat Walk
殷浩俊 陳祝安
盧國雄 司徒瑞祈
陳宇寧作架,都幾鼓舞

奮力游(無間道(粵語) 梁朝偉/劉德華)
曲: 伍樂城 詞:陳宇寧 編: 陳宇寧

我 要為我練下去 也為你練下去 捱極也未曾累
奇望我 永遠也在陶醉 若有未來依然要去追
EASY太短 MAIN SET無限遠 始終都不比北京這樣遠
不理會池上人浪太多 終點太少 累死也要去繼續轉圈

明明我已晝夜無間練盡我全力 夢想中的紀錄為何還未到
原來我要努力做到perfect動作 我kick pull也要練得好
誰先到終點 誰能知道 在這 奇妙的swim ming pool

Repeat #

如何能提高一分秒
如徘徊岸邊總是情願
要去到奧運迢長路遠
吃苦中苦 苦中苦 亦永不間斷

仍然確信晝夜無間努力向前游 夢想中的輝煌一定能達到
誰人與我奮力無間天天搏命 我天天也活得精彩
已到終點 才能知道 付出的又有多少 後悔太遲 

6月留言

30/6(MON)唔開心呀,阿Mark好似退休喇!泳會叫我寫封email比佢勸佢游埋出年奧運都唔知點寫........

29/6(SUN)好開心,一次過係匯景見晒肥樑,呀雪&Dickson哈!呀雪係咁問我教水有幾多錢搵,比呀添知道實鬧死佢∼肥樑就好羨慕咁追問我,Part 我個靚女教練係叫咩名喎∼Dickson,哈!一個乖仔黎架原來,佢D背泳真係大開眼界

23/6(SUN) 今日去左D1睇比賽同幫手做"媽嫂", 嘩!原來好多swimmers都認得我架,仲比肥陳讚左我10分鐘,佢同我講,話叫我咩"開創一個新天地",都幾鼓舞架,好開心呀!

想多謝幫過我既人呀!

呢排,我個網多左好多人睇,平均有200-300人次一日,真係多得大家支持,最開心係有人認同我既努力,以前我真係覺得吃力不討好,曾經想過放棄架,不過而家當然唔會喇,知道有人會睇,有人會support我,真係好有滿足感。我最想多謝好多比資料我,幫過我既人,好似有Dickson, 司徒, 阿雪, 肥樑, Sherry, Flora, Karen, Jennifer....數唔晒呀,最多謝係Dickson成日比意見我同司徒幫我拎support, 你地真係好人呀! 講真,我覺得我今年真係同班港隊埋左好多。以前,佢地就係知有個傑仔既人,而家佢地大部份都識得我,有好多仲主動contact我, 我真係好開心呀。比多d支持我喇, 我會做得更好!!

買左個網名,再大修個網面!

係Poly過左一個好辛苦既sem 1,終於有時間整下個網,其實自己一直想買domain name好耐,不過又驚貴因為之前用geocities時,成日話我太多人睇我個網,data tran唔到要封我個page,攪到成日入唔到or冇圖,煩死我!最後都係決心買個dot com, 我chose左hkswim.com易記嘛,不過真係好貴,成百蚊個月,好多人話我傻,個page又冇收入同贊助,做咩要用自己錢攪咁多野.講真,有時真係覺得吃力不討好,自己出錢又出力....不過當自己睇到愈來愈多人知我個網,再加上不少人支持自己.就有動機develop個網,所以我用一個月假大修個網,整靚d比大家睇得舒服d,不過真係要好多心機同時間呀!!最重要係,maintain個網真係要錢架,不過我已經冇乜,唔知有冇人肯贊助下我呢,我最想泳總比d支援我喇..哈哈!!

理工大專盃Champ唔到呀!

慘!今年poly雖然入左好多勁人,遂個挑都唔會輸,但係都打唔倒HKU,仲要後上追番先同分CHAMP男仔,真係估佢唔到,仲以為可以全場第一...不過大家真係好努力,我果日真係好開心,feel到好威,仲見識到咩叫勁人.好似司徒,我而家真係好鍾意佢,果日佢亞運後冇train一排,真係唔太fit.miss叫佢要破200im游2分15,佢最後真係游到,仲游到嘔.比起其他泳手可能都唔會咁同你博,佢仲兩破100蝶record, 真係好lum佢,really係一個好泳員.仲有陳耀斌, 佢好抵諗, 為左全隊, 佢明知200蛙冇乜機都游,比起第二D人都未必肯,最後阿Adam兩挫黃國基, 如果唔係我地都唔夠分.而且,其他成員都十分努力游,好開心呀,原來入左poly係可以咁得,最正緊係拉大隊映相,我仲同alex一齊拎個盃tim.

理工泳隊真係好勁

上左Degree,都知Poly水隊係最強,男仔今年入埋KenDoo,Adam Healy, 陳景熙,加上有司徒,陳耀斌,可以話無敵,成隊relay可以組成 一隊最fit既港隊陣容,雖然HKU入左黃國基,仲有方力申, 中大又有李焯倫,但係男仔我地Champ都應該冇問題, 人腳分分鐘勁過學界DBS.理大水運會當日,雖然司徒,KenDoo都去左亞運未返, 但係都好有睇頭,好似陳景熙50自游24.88,100自游54,佢真係fit左好多, 不過我地有KenDoo游53,佢迫住游背硬挑Alex,但係我估Alex今年 都應該冇人夠佢游.睇番大專形勢,黃國基近排弱左好多,而李焯倫100蛙又退左, 反觀司徙而家100蝶游56,陳耀斌50蝶都仲有26,唔計蝶蛙, 我地男仔加埋relay都應該可以玩晒.

講番自己,慘!雖然今年真係練足水,一三五係學校,二四六跟會, 但係都唔太起,可能真係老喇!灰死...不過可以同一班游水咁叻既人做隊友, 都算開心,而我都鍾意多左練水,追到D勁人,個種feel都幾正. 另外,原來都真係好多人以前有睇我個網,入到team都有ok多人知我係傑仔, 好有滿足感架!不過佢地可能想像傑仔係一個游水好快既人,錯晒喇! 我只不過係一條小金魚,希望係校隊入面貢獻自己.

全運表現遂個評

亞運尚不足一年,但港隊只與中國隊比賽,仍不足以奪取獎牌及進入頭5名,實有點可惜。但尚有時間,希望經過今次比賽,泳員會更有進步,在亞運再奪獎牌,為港爭光。現對泳員表現遂個評。

郭建明 200自創港隊歷屆最高排名
江欣琦 連破兩項蝶泳香港紀錄
蔡曉慧 100背創(1分03秒5)超快時間
陳詠雪 亦突破自己蝶泳香港紀錄
鍾國樑 400自只慢阿Mark1秒 
黃曉嵐 200蛙己超越廖嘉莉
彭淑梅 自由泳項目有明顯進步
司徒瑞祈 越老越勁,迴光返照
廖嘉莉 有少少退步,但仍keep到
符泳 短途開始有對手,小心
黃國基 後起之秀,但尚待磨練
馮學謙 後起之秀,但尚待磨練
吳芷荺 有少少退步之勢
費友燊 仍未能取代Alex背皇地位
方力申 表現走樣,但佩服仍keep到
譚智健 有少少退步之勢
鄧慶庭 後起之秀,但尚待磨練
趙善穎 有退步之勢
代表城大的日子
Yeah!我終於入選城大校隊喇!!!!

但係,練水真係很辛苦呀!冇練水咁耐,而家一個禮拜練5日,每次2小時,仲係放學時間先練,每次游4000、5000米,簡直想死。為乜?緊係為左代表城大參加大專盃喇。但係,學校真係有好多競爭對手,要爭取一席並不容易,好似有人50fr游26、50fly游28、50bk游31、50br游33,都幾恐佈!!我最大目標係代表城大,有套隊T,係大專盃同方力申碰頭,最好緊係係大專盃囉獎....不過,尚待努力!希望大家支持(^o^)

城大水運終於結束,失望是自己成績強差人意。講起當日,雖然城大在大專游水數一數二,但係水運會異常冷清,參賽者大多數為校隊,工作人員多過泳員。令人興奮的是,男子紀錄機乎全破,男女子總冠是我 trainer Thomas同海滴。
最突然係友校接力中,DGS竟派蔡曉慧參加,她游27秒in 50m fr,勁過我D男仔,令我大開眼界...........................

大專盃又過去了,回顧比賽,見到水平一直上升,我o也城大已盡了最大努力,在沒有星級泳員下,都可在港大、理工下得第三,已算有所交代。例如,港大有方力申、申法義;理工有司徒、陳耀斌、鍾家寶;中大又有黃海湲,加上我o也有家姐,真係星光滿天,加上有主場之利,格外高興。其中,高潮並不在Alex的50/100m背泳上,因沒有大多預期中的fans及記者到場,以及沒有太大對手同佢鬥。而高潮則在兩項男子接力項目上,港大、理工各勝一次,兩隊時間只相差不下一秒,可謂旗鼓相當,最後由理工男隊勝出。但男女合計則由港大奪冠,理工城大得2,3。

多將失準但幸奪獎牌

女子4乘100米4式接力銅牌可以說是港隊在東亞運動會中奪得最叫人意外的獎牌。雖然這面獎牌令泳隊突破上屆的成績﹐但觀乎整個東亞運﹐泳隊的表現實在未能叫人滿意。游泳最重要的是泳手的時間﹐不過港隊多位主力成員如郭建明,方力申等﹐在本身的強項所游出的時間均距離本身的最佳紀錄相去甚遠。唯一能夠游出水準的就只有女將蔡曉慧﹐她分別在100米背泳,200米4式及2個接力項目刷新了香港紀錄。

由此可見,港隊的未來就只能寄望單天保至尊的蔡曉慧,因郭建明,方力申等名將因前途問題而減少專注游泳,成績難免不斷下滑,但Sherry出年亦要考公開試,來年泳隊的成績不多不少也會受到影響。

難以置信的15項紀錄

2001年度分齡短池游泳錦標賽共刷生15項短池香港紀錄,
蔡曉慧憑八個參賽項目中七項打破港績的佳績。歷史上,在一場賽事刷新十五項香港紀錄,個人創下七項香港紀錄,又在單日比賽破下四項香港紀錄,以上全是香港泳壇一個新紀錄,簡直前無古人後無來者。已成為了本地泳壇的另一紀錄,可見本港游泳水平已有大進步。

可惜.....可惜!本人因為專心考A-level而錯失了這項盛事,真是有點遺憾,不能親眼目睹多項紀錄的誕生....歸納該項比賽,有以下特別轉變和意義:

一場賽事刷新十五項香港紀錄是香港泳壇一個新紀錄
蔡曉慧憑八個參賽項目中打破七項港績,
又破下非主項項目(一百米自由泳及五十米蝶泳)
成為最多香港紀錄的泳員
廖嘉莉打破了黃海滴兩項短池蛙泳紀錄
符泳得到第一個個人香港紀錄(五十米自由泳及一百米四式)
方力申破了非自己主項的1500米自由泳香港紀錄
費友燊得到第一個個人香港紀錄(五十米背泳)
李焯倫得到第一個個人香港紀錄(五十米蛙泳)
譚智健破一百米蛙泳香港紀錄
不准加入港隊訓練!

據聞某些老牌泳會,對泳員監管甚為嚴緊,就算游得出色,亦不准加入港隊進行訓練,要困在泳會內接受自己會教練的操練,就連與其他非會教練跟操也破責罰。雖然會有會規,但這些規則未免過份嚴格了。其實,跟不同的教練可學到不同的長處,泳員的進步也會加快,所以泳會不應約束泳員,要與他會合作交流,此比互相競爭還好呢!

Alex三分身

近日,從報章看到Alex有三個願望,
1)學業有不繼的進步
2)游泳上繼續創佳績
3)演藝事業有好開始
我想,一個人可否能同時兼顧學業、游水及演藝事業,可以好好地利用及分配有限的時間呢?當然很難,看來要連過三關才行,唔知Alex過三關叻唔叻呢?
1)在本港最高學府攻讀三年的學位課程
2)繼續為泳界一哥,不斷破紀錄
3)為力壓陳冠希的歌壇明日巨星
希望佢成功!做到前無古人後無來者的泳手。

香港一定得?

我曾經想過,若果香港成功申辦亞運,到時我便可做official,可惜!!香港失敗了....去者已矣,在香港泳壇上看,是失是得?失的,是泳員的target。據知有很多港隊都以2006年亞運為長期目標,游完收山,如果在香港舉辦,主場之利必事半功倍。另外,到期時應為港隊的豐收期,因泳員正不斷進步,但如今申辦失敗,不多不少也影響香港泳界的發展。得的,是教訓和經驗。從香港人對體育(尤其游泳)的冷淡,缺乏設施以應代大型賽事(現時只得殘破的九龍公園),已知香港失敗的原因。所以,政府應重視體育,積極推廣游泳,保障泳員生活,Next time,香港便一定得。

第一組....真係好正啊!!

當看過第一組比賽後,才頓知氣氛可以是如此的正!!個日放學去看D1決賽(最衰要返學),感覺超正,是D3完全feel不到的,上層cheer的肉緊,下層swimmers的speed,加上officers的認真,老師教練的精密部署,學校與死敵遂分競爭,真是令人血肉沸騰,心跳加速,是其他會際比賽沒有的,難怪Alex與Sherry都咁享受學界比賽,到場支持。最令人難忘的,不是在Relay時老師對泳員可能DQ.的緊張,亦不是旗海飄揚、座無虛席的場面,更不是得獎後掟老師落水的片段,而是頒獎時學校在達到目標後的喜悅和滿足:DGS16年冠、DBS7年冠、SJC得A組第一及勝LSC,協恩成功保2nd等,各自各興奮,各自各精采。

永別了....學界游泳錦標賽

今年是本人有生之年最後一次參加學界比賽,希望出年可在大專盃再度角遂(入到大學的話)。最後一年,亦是頗失望的一年,皆因空手而回。雖然兩項皆造出最佳時間,但決賽仍是落空....失望!!講到賽制,D3(Kowloon)有成52間中學角遂,實力一年比一年上升,數人破學界紀錄(為以往少見),但升班數目只有男女各一隊,是否不公平呢!!Anyway,都最後一年o羅,臨別秋波都不能有美好回憶。但經過五年的學界比賽,同學的支持,比賽的氣氛,自己亦有喜有樂有失落,我永不會忘記的,學界....永別了!

港隊奧運表現遂個評:
表現令人驚喜:
郭建明--勇破兩項紀錄兼走進頭三十名次,甚有大將風範,
             可說是香港眾多代表中最突出的一個。
方力申--亦破兩項紀錄,為港人增光不少。
            訪問時言談舉止的當,一定再增添不少fans。
表現OK:
陳詠雪--所謂初生之犢不懼虎,年紀少少的她面對大場面仍表現若定,
             差點便可破香港紀錄。
郭漢明--總算有所交代,比之前達標時間為快,並沒有浪費泳總抬舉之恩。
表現平平:
蔡曉慧--明顯上心理未能適應大賽氣氛,賽前驚到唔出得聲,
             因此表現一般,有點可惜。
江欣琦--未能發揮應有水平,但第一次參加奧運算有所交代。
符   泳--未能衝破其第一個香港紀錄,成績亦為一般。
表現教人失望:
譚智健--與之前創下的紀錄相距超過五秒鐘之多,
             可說是大失水準。
趙善穎--表現一般,可能因為大賽經驗不足,未能發揮應有水平。

港隊五大不值:
1)郭建明本可參加四個項目,但可惜因多種原因,現在只得兩項,
   大大減低爭取成績的機會。
2)譚智健本可參加兩個項目(100,200m蛙),但泳總決定將一百蛙
   讓給達標但時間較差的郭漢明。
3)以蔡曉慧的實力,應可達到多項奧運標準,但由於會考影響,
   致只得兩項,甚為不值。
4)廖嘉莉勇破100,200m蛙泳紀錄兼達標,狀態甚勇,惜遺時已晚,
   不能同隊征途。
5)其他泳手亦差點便能達標,如彭淑梅、吳芷荺等,若非如此,
   征途者一定多於九人。

香港游泳錦標賽(1-3/9/00)
好開心呀!!終於有機會睇到阿Mark來港作賽,真係好勁呀!!除了200im除去宿敵外,更是5項no.1,真係無敵。另外,會際200im接力,阿Mark一個追回三人,由3nd變1st,結果海天包辦男女4X100im接力no.1,真開心!!有開心亦有不開心,眼見廖嘉莉破完200蛙又破100蛙,但亦不得征戰奧運,實感可惜!!下屆努力吧,我支持你!不過有點失望,是奧運代表趙善穎及郭漢明,狀態頗差,實令人擔心出征成績。Anyway,見到咁多泳手出席皆是一樂也!

嘩!!8A2B,不要以為陳曉峰個樣傻頭傻腦,原來猛料之人,差點10A做狀元,真是可喜可賀!!!証明我所說,運動員未必一事無成。相反,游水o力多是名校生。

遺憾!!泳澶一姐蔡曉慧只得14分,真較人有點失望。但難怪她的,每日用數小時練水,又要返學,時間分配難,學業自然受影響。希望她能快些投入訓練,在奧運勇破佳績吧!!

7月22/23日我走去看長池分齡,可能因為奧運將近,想看看港將的狀態,能否為香港創造佳績。果然沒有令我失望,Alex大破100背,令我大開眼界,而本人亦是第一次目睹香港紀錄的產生。無見Alex比賽o禁耐,果然大隻o左好多,又成熟o左。

比賽前各人大叫他的名字,令沉悶的氣氛頓然熱鬧了,Alex很快便在100背拋開對手,起跳轉身一流,最終破港績,早知我帶view-cam拍低,轉造Real-player比大家看。(下次o剌!!)

講到Alex,破紀錄後沒有太大高興表現,看來很cool,我仲以為有大批記者、fans圍著他,結果只有小貓三四隻,他在全池周圍走亦沒有太多人注意他,比起上年,現在風頭已過。

走時剛巧遇見他與家人出外吃lunch,他在玩弄細路,又令我反思,其實做明星出名亦沒有多大不了,一家人一起才最開心。

反觀蔡曉慧,表現便大不如前,可能因為會考關係,停止訓練一排,狀態未能回復,主項100背只游1分06,200混合為2分31,表現難免令人有些失望。希望Sherry快些回復狀態,在奧運為港爭光。

然而,我料不到她會穿新泳衣上場(當時我走了),miss o左,泳總又話過不准泳員穿此泳衣在港作賽,Sherry今次只在最後一場50自才穿,可能想時裝表現一o下。

講真,她敗於彭淑梅是因為狀態不足,並非泳衣無用,短短50米Error只有零點數秒,泳衣幫助並不大,除非長途la。

話時話,譚郭大戰中,泳總判郭漢明勝。
但最近二人在100蛙的表現上,譚智健成績竟較優 

郭漢明 1:05.50(達標成績) 歐洲格蘭披治泳賽
(30/5-1/6/00)
譚智健 1:05.20(達標成績) 泛太平洋游泳錦標賽
(22-29/8/99)
郭漢明 1:07.09(最近成績) JANET EVANS INVITATIONAL
(13-16/7/00)
譚智健 1:05.01(最近成績) 長池分齡游泳錦標賽
(22-23/7/00)
vs

與其譚智健都有份去,不如比多個席位人,吸取多些經驗。其實,譚智健已擁有主項200蛙,100蛙只屬次項,而郭漢明主項為此。

另外,譚智健所造的時間已為一年多前,今年自己亦未能突破,至於郭漢明的成績為最近造出,屬是項的最佳狀態,況且只差百分之數秒,如現時舉行譚郭大戰,郭漢明勝出機會肯定比譚大。

記起四年前,香港出席亞特蘭大奧運的泳員只有三人,包括郭建明、李繼賢與彭蘊瑤。到今年,得到奧運入場券的竟多至九人,可見本港泳員真是進步了.......

我偶像阿Mark又再大發神威,真開心。雖然大家同一泳會,但我從未見過他,真是有點失望。Anyway,我真是很羨慕他。

學界慘敗

記得前兩年學界,在個人及接力都有獎囉。唯今年學界,竟兩大皆空。

在今年的數個比賽上,皆未能取得好成績,未有破.........唉!

講起今年學界,都真係幾變態。有條友是背泳高手,五十米竟游三十一秒,為何要落第三組比賽。另外有條C Grade友,五十自游二十六秒頭,DBS買硬。

學界遇"嬌拔"

決賽游二百四式,怎知在我隔離線是拍Y2K的Gilbert。嚇死我!以為輸硬!他真人都不是太handsome,只是高大。見他帶領新法班女一齊cheers,幾羨慕!到落水,在蝶式給他快放,到我強項背泳時,才追回頭位。

到弱項蛙式,我聽到很嘈,原來新法班女叫"阿嬌"加油。最後游自由,才輸了少許給他。我初頭以為他快如方力申(在Y2K與力申匹敵),點知同我差不多......失望!仲差D比我快過。

講真,他真係幾癲,新法得某組第二名時,他將某阿sir拋落水,連自己都落去,成身濕曬,真有病!

14/10/99

分齡見力申

有日幫泳會游分齡(第一組長池),雖然成績不大好,但最難忘的是見到方力申。他給我的第一個感覺,是有一大班記者跟住,並且在最後幾項才趕到,看來有些"大牌"。後來看報紙,才知他在那天是有機會達奧運標準,先有大班記者跟住做訪問。並且拍緊"Y2K前的暑假"比賽一幕,才有數部攝影機拍著他。幾"巴閉"!!!(^O^)

我上Y2K

後來睇番"Y2K前的暑假",才知自己在兩集也有上鏡,真有點榮幸。

其實,我覺得套劇都幾好睇。其中講到Alex(方力申)對游水之感覺最有意思:如他所言:

"水是用來練,不是用來玩。"
"游水游到無目標、無動力,自己是學界冠軍又如何!"
教練:"無進步便是退步,不如大家放棄。"
日日練水、練水、再練水,目標是什麼,為嘜!
讀書、前途、游水,如何取捨?
在香港游水是否沒有前途,真的要去美國?
接拍y2k會否影響"城運",結果........比符泳叻曬!
能夠體驗香港泳員的心情........正!

1999/7/25

去紅館睇比賽

仲記唔記得在紅館建臨時泳池,只為了一個"世界短池游泳錦標賽", 真可惜!!!!!!!!

四日比賽我睇了三日,最令我難忘的不是泳手英姿, 而是那個泳池,我真希望落去游下........好正!

其實,香港真需要類似的世界級泳池,除九龍公園外, 香港已沒有此類泳池了。 更難忘的是,場館內很少觀眾﹐根本沒有人留意運動賽事, 入場者多以免費券入場,真正買券的........少之有少。

講到比賽,原來波波夫也不太勁,連番敗北,可能老了。 其中最令我難忘,除克廉、科比外,便是班日本妹。 她們的強勢組合:中川真衣、田中雅美...... 在四乘一百米混合泳破了世界紀錄,真勁!

以上言論為本人發牢騷而已,與任何機構立場無關。
關於本網 - 免責聲明 - 版權聲明 - 聯絡網主
Copyright (C) 1999-2004. Kiman's swimming pool. All Rights Reserved.