22/10/2006,城市大學,50M
| 第一名 | 第二名 | 第三名 | |
| 全場總名次 | 香港大學 | 理工大學 | 城市大學 |
資料來源：香港大專體育協會
<<大專盃圖片展>>
嬌蛙化蝶贏得轟烈
青蛙除咗可以變王子之外，原來變蝴蝶都一樣掂㗎！好似香港泳隊首席「蛙后」孫嘉兒，喺今屆大專水運會中代表浸會大學「化蝶」出戰五十米蝶泳，「踩過界」挑戰理工大學陣中嘅兩屆奧運代表「蝶后」陳詠雪。結果孫嘉兒游出破大會紀錄時間廿九秒八一，並以○點○一秒之微力壓陳詠雪，一下子成為全場焦點！
自從去年度過咗十八歲生日後，孫嘉兒就開始集各項榮譽於一身，好似亞洲錦標賽獎牌、大專最佳運動員、以及喺被譽本地體壇「奧斯卡」嘅傑出運動員選舉中獲得殊榮。
近一年創下唔少佳績嘅孫嘉兒，參加大專賽亦製造唔少驚喜。由於浸大陣中已擁有前女拔萃隊長廖嘉莉呢位「娃后」出戰五十同二百米蛙泳項目，故孫嘉兒亦只得「將就」一下，參加一百米蛙及轉戰五十米蝶。喺「老本行」一百米蛙泳中佢當然無驚無險游返終點啦！時間係一分十五秒九八、比第二名嘅理大泳手梁天芸快咗十二秒一九時間摘金。
百分一秒贏陳詠雪
去到全日戲肉嘅五十米蝶泳賽，「踩過界」嘅孫嘉兒挑戰理大嘅兩屆奧運飛魚陳詠雪。雖然陳詠雪已經游出打破大專紀錄嘅廿九秒八二，但孫嘉兒仲要比佢快○點○一秒到達終點奪標。
即將喺十二月代表香港出戰亞運嘅孫嘉兒表示：「無論係大專盃或者亞運我都會以平常心面對，咁先可以游出好成績。雖然今次亞運缺少咗羅雪娟呢個好朋友、好對手參加而令我有啲失望，但我仍會力爭佳績。」
團體賽方面，衞冕全場總冠軍、坐擁鍾國鼎、殷浩俊等飛魚嘅理大，亦以三分之微負於有亞運戰將李振濤壓陣嘅港大，拱手將水霸王之位讓出。
東方日報 31/10/2006
