京奧達標最後衝刺
13/03/2008

苦練水底反蝶腳
劉彥恩差0.23秒上岸

究竟零點二三秒可以做d乜?答案係「游向北京」!被喻為「蔡曉慧接班人」的十五歲「小飛魚」劉彥恩,去年以兩分十七秒六一刷新二百米背泳香港紀錄,比取得奧運入場券的達標時間只欠零點二三秒!呢位「女拔萃飛魚」依家正在苦練必殺技「水底反蝶腳」,目的要在四月舉行的「截標」賽事奧運計時賽中,聯同其餘幾位小飛魚力爭「上岸」去北京!

距離搭上奧運「尾班車」的計時賽仲有約一個月時間,多位「未上岸」飛魚均嘗試作最後衝刺。論最有機會達標女泳手,Claudia(劉之英文名)肯定係熱門,因為佢只係差零點二三秒就可達成京奧夢!
劉彥恩即使於上年九月打破由師姐蔡曉慧保持的二百米背泳香港紀錄,但比起達到奧運參賽資格的B標準兩分十七秒三八,仲差零點二三秒,而上月於「水立方」舉行的中國游泳公開賽二百米背泳,Claudia亦未能游出達標時間,所以她的京奧夢將全部押注在四月!

望與蔡曉慧並肩作戰

雖然「水立方」之行未竟全功,卻加強Claudia衝擊奧運資格的決心:「個場館真係好宏偉,尤其佢係由中國人興建,所以特別想於水立方游我夢寐以求的奧運比賽。」要克服呢零點二三秒的障礙,劉彥恩就要改善轉塘動作的不足:「轉塘時我的『水底反蝶腳』有偏差,導致時間慢了。另外,我於最後五十米的轉身亦有點氣力不繼,所以改良轉身技巧同加強體能,係我奪取奧運入場券的方法。」
因為劉彥恩與亞室運八金得主蔡曉慧同樣係拔萃女書院「優良產品」,亦係以背泳為主項,所以Claudia被外間認定為「蔡曉慧接班人」。不過,由於蔡曉慧於女拔畢業後劉彥恩至升讀中學,所以咁多年佢都未試過同師姐兼偶像一齊入選並肩作戰,Claudia話要把握北京奧運呢個蔡曉慧退休前最後一個比賽旳機會,實現同場比賽的夢想!

學校: 拔萃女書院
年齡: 15歲
主項 200米背泳
最佳時間 2分17秒61
達標時間 2分17秒38
尚欠 0.23秒
威水史
08年中國游泳公開賽200米背泳殿軍

江忞懿破枷鎖豁出去

新進「蛙后」江忞懿,於今屆學界賽事打破香港二百米蛙泳紀錄而一鳴驚人,但佢並冇停下進步的步伐,早前於「水立方」出戰中國游泳公開賽,以兩分卅五秒四五再將紀錄翻新,比起兩分卅三秒四○的達標時間只差一點點!
教練陳耀海認為Yvette(江之英文名)只要衝破枷鎖,達標應不成問題:「江忞懿訓練一向都好有計劃、有步驟,但咁樣反而令佢綁手綁腳,未能完全發揮。」而Yvette就話:「最終結果得唔得係一回事,今次點都要豁出去!」佢話會冒險於轉身時偷少少時間,期望可縮減呢兩秒○五的障礙。

學校: 拔萃女書院
年齡: 15歲
主項 100米蛙泳 200米蛙泳
最佳時間 1分12秒58 2分35秒45
達標時間 1分11秒43 2分33秒40
尚欠 1秒15 2秒05
威水史
100米、200米蛙泳長池及短池香港紀錄保持者

藍家汶發育要減肥

於○六年多哈亞運以十三歲之齡,成為香港代表團最年輕泳手的「超新星」藍家汶,爭取京奧入場券前遇上極大障礙,就係發育問題!教練陳耀海指出以Carmen(藍之英文名)原本進度,爭取達標應唔成問題,不過就撞正發育,體內脂肪比例多,變相令肌肉減少,力量亦相繼下降,影響表現!
現時為四百米混合泳香港紀錄保持者的藍家汶,距離達標尚欠二秒九八,佢話呢段時間會好好咁控制脂肪,出盡全力減肥!

學校: 拔萃女書院
年齡: 14歲
主項 400米混合泳
最佳時間 4分58秒04
達標時間 4分55秒06
尚欠 2秒98
威水史
400米混合泳、1500米自由泳香港紀錄保持者

施幸余望天打卦!

作為近年本地泳壇代表人物的施幸余,偏偏卻遲遲未能做出達標時間,令不少人都擔心起來!港隊總練陳耀海透露:「施幸余教練水時試過做出達標時間,證明佢實力已經遠超奧運標準,可惜佢每次比賽前都會患上感冒,影響表現。」
希望未來一個月都唔好畀病毒入侵的施幸余,就話自己應該做的事已經做晒,最後能否達標就要「睇天」!雖然放鬆了心情,但佢話並唔代表已經放棄:「自己於○四年都去過奧運,而早前我亦到過『水立方』比賽,都叫做睇過同游過,即使最後遇上最壞的結果,都算係無憾。」

學校: 拔萃女書院
年齡: 20歲
主項 50米自由泳 100米蝶泳
最佳時間 26秒60 1分01秒58
達標時間 26秒28* 1分01秒43
尚欠 0.32秒 0.15秒
威水史
06年多哈亞運自由泳接力銅牌
註:*為陳宇寧達標時間

四女飛魚已達標

暫時共有四名本港泳手達到奧運B標準,可以參加京奧,包括蔡曉慧歐鎧淳韋漢娜陳宇寧,當中最威水係暫時手持三張奧運入場券的歐鎧淳,而她於四百米自由泳更造出四分十三秒八一,只差兩秒就達到奧運A標準。

奧運計時賽最後召集

奧運游泳賽達標分為A標準及B標準,前者時間較B標準為快,每個參賽地最快兩名泳手可出戰奧運,例如菲比斯、妮絲鍾絲等名將都憑A標準時間達標。而香港泳手則普遍以達B標準為目標,但每個項目出賽名額只得一個,所以在限期前邊個達標時間最快,就可取得呢張入場券。
雖然國際奧委會把截標日期定為七月十五日,但在此之前最後一個符合資格的本地認可賽事,只剩番四月舉行的奧運計時賽,故香港泳手要把握呢個最後「上岸」機會。

東方日報 13/03/2008

更多本港泳界消息
本地比賽 學界比賽
對外比賽 綜合新聞

返回主頁

關於本網 - 免責聲明 - 版權聲明 - 聯絡網主

Copyright (C) 1999-2008. hkswim.com. All Rights Reserved. 版權所有 不得轉載